Xasan Ruuxaani oo ku guulaystay doorashadii dalka Iiraan

205

MODERATE

Madaxweynaha dalka  Iiraan Xasan Ruuxaani, ayaa ku guulaystay doorashada  guud ee madaxtinnimo ee shalay ka dhacday dalkaasi, sida uu baahiyay telefishinka qaranka wadankaas.

Iyadoo la tiriyay ku dhawaad dhammaan codadkii laga dhiibtay doorashada oo ahaa 40 milyan oo cod, ayaa Ruuxaani waxa uu helay boqolkiiba 56, sidaana waxa uu uga badbaaday wareeg kale.

Ibraahim Raisi, oo ah ninka la tartamayay Ruuxaani ayaa sheegay in taageerayaasha madaxweynaha ay falal sharciga ka baxsan ka geysteen goobaha cosbixinta intii ay socotay doorashada guud ee dalkaasi.

Waqtiga codbixinta ayaa qaadatay  muddo ku dhow 5 saac ah lagu kordhiyay, oo waxa ay goobaha doorashada xirmeen saqdii dhexe ee xalay, ka dib markii ay dad badan usoo baxeen in ay codkooda dhiibtaan.

Ruuxaani oo 68 jir ah, ayaa ballanqaaday in uu Iiraan ku hogaaminayo aragti dhexdhexaad ah, waxaana uu guushiisa ku xiray ka mira dhalinta heshiiska nukliyeerka ee uu dalkiisa la galay dalalka caalamka ugu taagta roon.